عماد وسیم نے ریٹائرمنٹ کا فیصلہ واپس لینے پر ایک شرط رکھ دی

سلیکٹرز اور ٹیم مینجمنٹ کے رویے سے مایوس آل راؤنڈر عماد وسیم نے ریٹائرمنٹ سے مشروط دستبرداری پر غور شروع کر دیا ہے۔ ایک بیان میں قومی کرکٹر عماد وسیم نے کہا کہ ان کا انٹرنیشنل کرکٹ سے ریٹائرمنٹ کا فیصلہ درست تھا۔

انہوں نے کہا کہ اگر ٹیم انتظامیہ ٹیم کے اندر ان کے کردار کو واضح کرتی ہے تو وہ اپنے فیصلے پر نظر ثانی کے لیے تیار ہیں۔ تاہم، وہ اس بارے میں غیر یقینی ہیں کہ پاکستان کو کب ان کی خدمات درکار ہوں گی۔

غور طلب ہے کہ عماد وسیم نے نومبر 2023 میں ریٹائرمنٹ کا اعلان کیا تھا۔ پاکستان کی نمائندگی کرتے ہوئے انہوں نے 55 ون ڈے اور 66 ٹی ٹوئنٹی میچز کھیلے ہیں۔ عماد نے ون ڈے میں 44 اور ٹی ٹوئنٹی میں 65 وکٹیں حاصل کیں، جبکہ دونوں فارمیٹس میں 1400 سے زائد رنز بھی بنائے۔ مزید برآں، وہ پاکستانی کرکٹ ٹیم کا حصہ تھے جو 2017 کی چیمپئنز ٹرافی میں فاتح بنی تھی۔