بابراعظم ایک بار پھر کپتان بننے کے قریب

پاکستان کرکٹ بورڈ (پی سی بی) کے چیئرمین کی تبدیلی کے بعد لیجنڈری بلے باز بابر اعظم کے دوبارہ قومی ٹیم کی کپتانی سنبھالنے کے امکانات روشن ہو گئے ہیں۔ نیوز ویب سائٹ ‘پروپاکستانی’ کے مطابق متعدد میڈیا رپورٹس کے مطابق پی سی بی کے نئے تعینات ہونے والے چیئرمین محسن نقوی جلد ہی بابر اعظم کو قومی کرکٹ ٹیم کا کپتان مقرر کریں گے۔

گزشتہ روز محسن نقوی، جو صوبہ پنجاب کے نگراں وزیر اعلیٰ بھی ہیں، کو پی سی بی کا چیئرمین نامزد کیا گیا۔ وہ اگلے تین سال تک اس عہدے پر فائز رہیں گے، اور ان کی تقرری سے پی سی بی کے اندر اہم تبدیلیاں متوقع ہیں۔ غور طلب ہے کہ گزشتہ سال ورلڈ کپ 2023 میں مایوس کن کارکردگی کے بعد بابر اعظم نے کپتانی چھوڑ دی تھی، شاہین آفریدی نے ٹی ٹوئنٹی کی قیادت سنبھالی تھی اور شان مسعود ٹیسٹ فارمیٹ کی قیادت کر رہے تھے۔ ان کی کپتانی میں قومی ٹیم کو حال ہی میں نیوزی لینڈ کے خلاف ٹی 20 سیریز (4-1) اور آسٹریلیا کے خلاف ٹیسٹ سیریز (3-0) میں شکست کا سامنا کرنا پڑا۔