دی پاکستان ٹوڈے پاکستانی اور دنیا بھر سے تازہ ترین خبریں
پہلی مرتبہ افغانستان کے خلاف تین ٹی20 میچز کیلئے کپتانی کے فرائض سرانجام دینے والے شاداب خان کا کہنا ہے کہ اپنی قیادت میں نوجوان ٹیم کو لڑانا چاہتا ہوں تاکہ ہمارے مداحوں کو دلچسپ مقابلے دیکھنے کو ملیں۔ پاکستان کرکٹ بورڈ (پی سی بی) کی جانب سے جاری کردہ ویڈیو میں کپتان شاداب خان نے
کہا کہ نوجوان کھلاڑیوں پر مشتمل ٹیم شاندار ہے، عماد وسیم، فہیم اشرف، عبداللہ شفیق، طیب طاہر، اعظم خان اور صائم ایوب جیسے کرکٹرز بہرین فارم میں ہیں۔ انہوں نے کہا کہ عماد وسیم اور فہیم اشرف بہترین آل راؤنڈر ہیں، ٹیم میں ان کی شمولیت سے مڈل آرڈر مضبوط ہوگا جب کہ میں خود بطور کپتان ٹیم کے لیے اہم کردار ادا کرنے کی کوشش کروں گا۔ شاداب خان نے کہا کہ اللہ تعالی کا شکر گزار ہوں کہ اس نے مجھے ملک کی نمائندگی کا موقع دیا، 22 کروڑ عوام کا سر فخر سے بلند کرنے کی کوشش کروں گا، اپنی تمام تر صلاحیتیں بروئے کار لاتے ہوئے جیتنے کی کوشش کروں گا۔ گزشتہ روز پاکستان کرکٹ بورڈ (پی سی بی) نے پاکستان اور افغانستان کے درمیان سیریز کے لیے 18 رکنی اسکواڈ کا اعلان کیا تھا جس کے لیے شاداب خان کو کپتان مقرر کیا گیا تھا۔
واضح رہے کہ بابر اعظم، محمد رضوان، شاہین شاہ آفریدی اور فخر زمان کو سیریز کے لیے آرام دیا گیا ہے۔ دونوں ممالک کے درمیان تین میچوں کی سیریز کا پہلا میچ 24 مارچ، دوسرا 26 مارچ جبکہ تیسرا اور آخری میچ 27 مارچ کو شارجہ میں کھیلا جائے گا۔
