میں نہیں چاہتا تھا کہ شاہین آفریدی کپتان بنے ، بلکہ اس کھلاڑی کو کپتان دیکھنا چاہتا تھا ، شاہد آفریدی

پاکستان کے سابق کپتان شاہد آفریدی نے شاہین شاہ آفریدی کے کپتان بننے کے لیے مبینہ لابنگ کے حوالے سے متعدد ٹرولز کی جانب سے ان پر کی جانے والی تنقید کا جواب دیا ہے۔ بابر اعظم نے حال ہی میں تینوں فارمیٹس کی کپتانی چھوڑ دی تھی۔ پاکستان کرکٹ بورڈ (پی سی بی) نے شاہین آفریدی کو ٹی ٹوئنٹی ٹیم کا کپتان اور شان مسعود کو ٹیسٹ کپتان مقرر کر دیا ہے۔

شاہد آفریدی جو کہ شاہین کے سسر بھی ہیں، نے واضح کیا کہ وہ کبھی بھی ان کی کپتانی کی وکالت کے حق میں نہیں تھے۔ ایک مقامی نیوز چینل کو انٹرویو کے دوران انہوں نے کہا کہ میں نے کبھی بھی شاہین کو بطور کپتان سپورٹ نہیں کیا، پی ایس ایل فرنچائز لاہور قلندرز کا کپتان بننے کے بعد بھی میں نے اس فیصلے پر تنقید کی۔

انہوں نے یہ کہتے ہوئے اپنی مایوسی کا مزید اظہار کیا کہ "میں کس کا منہ بند کروں؟ سوشل میڈیا پر ایسی باتیں پڑھ کر مجھے دکھ ہوتا ہے۔”

شاہد آفریدی نے یہ بھی انکشاف کیا کہ نگراں وزیر اعظم انوار الحق کاکڑ اور پی سی بی مینجمنٹ کمیٹی کے چیئرمین ذکا اشرف سے ملاقات میں انہوں نے بابر اعظم کو جلد بازی میں ٹیسٹ کپتان بنانے کے خلاف مشورہ دیا۔ شاہد آفریدی نے شیئر کرتے ہوئے کہا کہ جب نگران وزیراعظم نے میری رائے مانگی تو میں نے بابر اعظم کو تبدیل کرنے کا جلدبازی میں فیصلہ نہ کرنے کا مشورہ دیا اور انہیں ٹیسٹ میچوں کے لیے مستقل کپتان برقرار رکھنے کی سفارش کی۔

مزید برآں، انہوں نے ذکا اشرف کو مشورہ دیا کہ وہ ملتان سلطانز کے ساتھ ان کی غیر معمولی کارکردگی کو دیکھتے ہوئے محمد رضوان کو وائٹ بال کرکٹ کا کپتان مقرر کریں۔